"ရိုးသားမှုလိုသလောက်ရနိုင်ပါသည်" လို့ ခန့်ခန့်ညားညားကြီး ချိတ်ဆွဲထားတဲ့ စာတမ်းအောက်က မန်နေဂျာစားပွဲမှာ ကျွန်တော် အလုပ်လုပ်ခဲ့တာ အနှစ် (၃၀)ကျော်ပါပြီ။ အလုပ်စ၀င်တဲ့ ရုံးအကူလုပ်သက်၊ စာရေးလေး လုပ်သက်တွေပါ ပေါင်းရင် လုပ်သက်(၄၅)နှစ်ကျော် ရှိပါတယ်။ အဲဒီကုမ္ပဏီမှာ အရောင်း မြှင့်တင်ရေး မန်နေဂျာအဖြစ် ရိုးရိုးသားသားနဲ့ ဒီလောက်ကြာ တာဝန်ထမ်းဆောင်ဖြစ်ခဲ့တဲ့ အကြောင်းရင်းက...။
ကျွန်တော့်ဘော့စ်(Boss)က အပြောအဆိုနူးညံ့သိမ်မွေ့သလို လူပုံကလည်း တည်ကြည်ခန့်ငြားသူပါ။ အနေအထိုင် သန့်ရှင်းသပ်ရပ်ပြီး ပြုမူလှုပ်ရှားပုံက အေးချမ်းပါတယ်။ မိန်းကလေးများမြင်ရင် နှစ်ခါပြန်ကြည့် ရလောက်အောင် ဆွဲဆောင်မှုရှိတယ်။ သူ့ကို ရင့်ကျက်သူလို့ ကျွန်တော့်သူငယ်ချင်း စာရေးဆရာတစ်ယောက်က မှတ်ချက်ချဖူးပါတယ်။ ကျွန်တော်ကတော့ အဲဒါတွေ သိပ်တော့ နားမလည်ပါဘူး။ ကျွန်တော် နားလည်ထားတာက ကျွန်တော့်ဘော့စ် ဘာပြောပြော ပြောသမျှဟာ မှတ်သားထိုက်၊ နာယူထိုက်တာချည့်ပဲလို့ပဲ နားလည်ပါတယ်။ လူတစ်ယောက်ကို အပြစ်တင်ကျိန်းမောင်းပြီး မပြောတတ်တဲ့ ဘော့စ်မို့ ကျွန်တော်တို့ ၀န်ထမ်းတွေက လေးစားချစ်ခင်ကြပါတယ်။ ဘော့စ်စကား ဆိုရင် အားလုံး မြေ၀ယ်မကျပဲ။
''ကျွန်တော်ငယ်ငယ်က သိပ်ဆင်းရဲခဲ့တာ။ စားစရာမရှိ၊ သောက်စရာမရှိလို့ သူတစ်ပါးအိမ်မှာ မှီခိုကပ်ရပ်နေထိုင်ခဲ့ရပါတယ်။ အရာရာ ချို့ငဲ့နေပေမယ့်.. ကျွန်တော့်မှာ ပြည့်စုံတာ တစ်ခုတော့ရှိတယ်။ အဲဒါကတော့ ရိုးသားမှုပဲ။ ကျွန်တော့်ဘ၀ကို အဲဒီရိုးသားမှုနဲ့ ထုဆစ်ခဲ့ ရပါတယ်။ ဒါကြောင့် ကျွန်တော်တို့
ကုမ္ပဏီရဲ့ လက်တွဲဖော်ဝန်ထမ်းတွေ အနေနဲ့လည်း ဘ၀မှာ ရိုးသားကြဖို့ အလေးအနက် မှာကြားချင်ပါတယ်'' ကျွန်တော့်ဘော့စ်က အဲဒီလိုလူစားပါ။ သူပြောရင် ဘယ်တော့မှ တဘက်သတ်မပြောဘူး။ အကျိုးနဲ့ အကြောင်းနဲ့ ၊ အကြောင်းနဲ့ အကျိုးနဲ့ မျှမျှတတ ပြောလေ့ရှိပါတယ်။ ဒီလို အကျိုးအကြောင်း မျှမျှတတ ပြောတတ်တဲ့အပြင် ကျွန်တော်တို့ ၀န်ထမ်းတွေ ၊ မန်နေဂျာအပါအ၀င်ပေါ့ အပတ်စဉ်၊ လစဉ်တွေ့ဆုံပြီး ၀န်ထမ်းမိသားစု ဆန္ဒဖော်ထုတ်ပွဲ (ဒါဘာ) အစည်းအဝေးလုပ်ပေးလေ့ရှိပါတယ်။ ၀န်ထမ်း တစ်ဦးချင်းစီရဲ့ လုပ်ငန်းအပေါ် သဘောထားအမြင်၊ လုပ်ငန်းရဲ့ အားသာချက် အားနည်းချက်နဲ့ လုပ်ဆောင်ရာမှာ အခက်အခဲ စသည်ဖြင့် လွတ်လွတ်လပ်လပ် ပြောဆိုတင်ပြဆွေးနွေးခွင့်ရပါတယ်။ ၀န်ထမ်းမိသားစု ပြောဆိုဆွေးနွေးကြ၊ တိုင်ပင်ကြ၊ ပွင့်ပွင့်လင်းလင်း ဝေဖန်ကြနဲ့ ရိုးသားမှု အခြေခံကောင်း တွေကို တိုးတက်မြှင့်တင်ပေးနေသလို ရှိနေပါတော့တယ်။ ကုမ္ပဏီရုံးခန်းထဲကို ကြည့်လိုက်ပါဦး..၊ ရိုးသားမှုနဲ့ ပတ်သက်ပြီး ၀န်ထမ်းတိုင်း လိုက်နာရမယ့် ကျင့်ဝတ်တွေ ရေးထားသေးတယ်။
''ရိုးသားမှုသာ ဂုဏ်ယူစရာ''
''အနည်းငယ်သော မရိုးသားမှုက ကြီးမားတဲ့ မရိုးသားမှုကို ဖြစ်စေတယ်''
''ရိုးသားမှု အခြေခံကောင်းမှ ဘ၀ဟာ တင့်တယ်မြင့်မားမယ်''
ဒါတွေတင် မကဘူးဗျ။ ကျွန်တော့်ဘော့စ်က ရိုးသားသူကို အရမ်းတန်ဖိုးထားတယ်။ လေးစားတယ်။ နေရာပေးတယ်။ ချီးမြှင့်တယ်။ ဂုဏ်ပြုတယ်။ ''ကျွန်တော် ရုံးအကူကနေ စာရေးလေး၊ နောက်တဖြည်းဖြည်းနဲ့ မန်တေနဂျာ စသည်ဖြင့် ရာထူး အဆင့်ဆင့် တိုးလာတာဟာ ရိုးသားမှုကြောင့်ပါ။ ဒါကြောင့် ရိုးသားရမယ်။ မရိုးသားသူအတွက် ဒီမှာ နေရာမရှိဘူး။ ဒါကြောင့် အားလုံး ရိုးသားကြပါ'' ကျွန်တော့်ဘော့စ်က သူရာထူး တဆင့်ချင်း တိုးတက်လာတဲ့ အကြောင်းပြောတော့ ဘော့စ်က ကျန်ဝန်ထမ်းတွေအားလုံးထက် ကျွန်တော့်ကို ၀င့်ကြည့်ပြီး ပြောနေတာဗျ။ ကျွန်တော်လည်း ဘော့စ်ရဲ့ ကုမ္ပဏီမှာ ရုံးအကူ၊ စာရေး၊ နောက်မန်နေဂျာဆိုပြီး ရာထူးတိုး လာတာ။ ကျွန်တော်ဘော့စ်(Boss)က အဲသလိုပြောတတ်သလို တစ်ခါတစ်ခါ ပြောတတ်တာက..
''ကျွန်တော်တို့ဟာ ၀န်ထမ်းတွေရော၊ ကုမ္ပဏီခေါင်းဆောင်တွေ၊ ဥက္ကဌ၊ ရှယ်ယာရှင်တွေဟာ အနေအထားအမျိုးမျိုးနဲ့ ဒီကုမ္ပဏီကြီး ရေရှည်တည်တံ့ဖို့နဲ့ တိုးတက်ဖွံ့ဖြိုးဖို့ လုပ်ငန်းကဏ္ဍအလိုက် တာဝန်ယူဆောင်ရွက်နေကြရပါတယ်။ ပြောရရင် ကျွန်တော်တို့ဟာ တစ်လှေတည်းစီး၊ တစ်ခရီးတည်းသွား ဆိုသလိုပေါ့၊ အားလုံးဟာ ရည်ရွယ်ချက် လမ်းကြောင်း တစ်ခုတည်းမှာ သွားလာနေကြ၊ လုပ်ကိုင်နေကြရတယ် မဟုတ်လား။ အဲဒီလို လုပ်ကိုင်ကြတဲ့ နေရာမှာ ကျွန်တော်တို့ မဖြစ်မနေ ရိုးရိုးသားသား လုပ်ကြဖို့ လိုတယ်။ မရိုးသားမှုရဲ့ ဆိုးကျိုးတွေ အများကြီးပါ။ ကျွန်တော့်ရဲ့ လက်တွဲဖော် များအားလုံးကို ပြောကြားချင်တာကတော့....
ပထမ ရိုးသားရမယ်၊ ဒုတိယ ရိုးသားရမယ်၊ တတိယ ရိုးသားရမယ်၊ စတုတ္ထ ရိုးသားရမယ်၊ ပဉ္စမ ရိုးသားရမယ်။ အားလုံး လုံးဝရိုးသားကြရမယ်။ ကျွန်တော်တို့ရဲ့ မနက်ဖြန်ကို တိုးထွက်မယ့် ခြေလှမ်းတိုင်း ရိုးသားမှု ပြည့်ဝနေရပါမယ်။ အဲဒီလိုမှ မဟုတ်ရင်တော့......။ မရိုးသားသူအတွက် ဒီမှာ နေရာမရှိဘူး''
အဲဒီလိုနဲ့ ..၊ ကျွန်တော့်ဘော့စ်ရဲ့ ဦးဆောင်မှု၊ ၀န်ထမ်းတွေရဲ့ အရည်အသွေးမီ ရိုးသားမှုကြောင့် ကျွန်တော်တို့ ကုမ္ပဏီဟာ တစ်ဟုန်ထိုး တိုးတက်လာပါတယ်။ ပစ္စည်းမှာကြားတဲ့ အမှာစာတွေ တဖွဲဖွဲဝင်လာတာများ မိုးရွာနေသလားတောင် မှတ်ရတယ်။ လုပ်ငန်းအောင်မြင်မှုကလည်း ဒီရေ အလား အရှိန်ပြင်းပြင်း တိုးတက်လာပါတယ်။ နေ့စဉ်နေ့တိုင်း အရောင်းစာရင်းချုပ်ရင် တိုးတက်မှုချည့်ပဲ။ ကျွန်တော်တို့ကုမ္ပဏီဟာ အအောင်မြင်ဆုံး၊ အတိုးတက်ဆုံးဆိုတော့ ကျွန်တော်လုပ်ခဲ့တဲ့၊ ကျွန်တော် တာဝန်ထမ်းဆောင်ခဲ့တဲ့ ကုမ္ပဏီအတွက် အလွန်ဂုဏ်ယူပါတယ်။ အခုလို အလုပ်က အနားယူခဲ့ပေမယ့်.. ကျွန်တော့် ကုမ္ပဏီအတွက် ဂုဏ်ယူနေဆဲပါ။ ကျွန်တော် သေတဲ့အထိ ဂုဏ်ယူနေမှာပါ။
အဲ..၊ ဟုတ်ပါရဲ့ မေ့နေလိုက်တာ။ ကျွန်တော်တို့ ကုမ္ပဏီက ဘာပစ္စည်းတွေ ထုတ်လုပ်ရောင်းချတာလဲဆိုတာ မပြောရသေးဘူး။ ကျွန်တော်တို့ ကုမ္ပဏီက ထုတ်လုပ်ရောင်းချတာက မန်နေဂျာစားပွဲအထက်မှာ ချိတ်ထားတဲ့ စာတန်းကို ကြည့်လေ။ ကျွန်တော်တို့ ကုမ္ပဏီက အဲဒါရောင်းတယ်။
ဝတ္ထုတိုများ